Uncategorized

Ìròyìn Òwúrò̩ t’ò̩sè̩ yí

Ohun tí ò̩pò̩ kò mò̩ nípa Oníwàásí àgbáyé nnì , Sheik Muyideen Ajani Bello

Fẹ́mi Akínṣọlá

Bá a pẹ́ láyé bíi kánrin, bá a gùn lẹ́mì í bí okùn tó gùn gùn gùn, bíkú bádé gbogbo ìgbìyànjú ọlọ́gbọ́n á dòmùgọ̀.
Àrùn ló gbọ wíwò, a ò rí ti olọ́jọ́ ṣe.

Bó tilẹ̀ jẹ́ pé bàbá ọ̀hún kìí ṣe ọmọdé, nítorí ó ti lé lẹni ọgọ́rin ọdún dáadáa, síbẹ̀, agbọ́-sọgbá -nù ni ikú àgbà oníwàásí tí gbogbo èèyàn mọ̀ bíi ẹni mowó nnì, Sheik Muideen Ajani Bello jẹ́ fún gbogbo àwọn tí wọ́n gbọ́ pé ọ̀kan pàtàkì nínú àwọn táwọn Mùsùlùmí máa n fẹ́ràn wàásí rẹ̀ náà ti jáde láyé.

Titi ta a fi n ko iroyin yii jọ, ko ti i sẹni to mọ ohun to ṣokunfa iku baba to fi ilu Ibadan ṣebugbe ọhun.

Bo tilẹ jẹ pe o nira fun ọpọ awọn ololufẹ baba ọhun lati gbagbọ, sibẹ, ọpọ awọn to sun mọ baba agba oniwaasi yii ni wọn ti n gbe e sori ayelujara wọn, ti wọn si ti n daro iku baba agba naa.

Kaakiri origun mẹrẹẹrin ilẹ Yoruba, to fi mọ ilẹ Hausa, ni wọn ti mọ baba oniwaasu naam nitori gbogbo ibẹ ni wọn ti maa n pe e pe ko waa ṣe waasi. Lasiko aawẹ ni aọn eeyan si maa n gbadun rẹ ju pẹlu awọn waasi iṣiti ọrọ ikilọ ati awọn ẹkọ kuraani to maa n jade lati ẹnu rẹ.

Ọdun 1940 ni wọn bi i sinu mọlẹbi Alaaji Bello Ajani ati Ubaidat Ajani Bello, ti agboole Arolu, Ita Olukoyi, niluu Ibadan.

Ileewe alakọọbẹrẹ ICD, Elekurọ ni Babab Muheedeen ti kawe alakọọbẹrẹ, ibẹ naa lo si ti ka girama. Ọmọọdun mẹwaa ni Muyedeen Bello wa to ti fifẹ han si ẹkọ alukuraani, to si ti n waasu kaakiri origun mẹrẹẹrin Ibadan.

Ileewe ẹkọ kewu ti wọn n pe ni Mahdul Arabiy to wa ni Elekurọ lo lọ laarin ọdun 1963 si 1967.

O ti kọ ẹkọ gẹgẹ bii olukọ imọ Islam lawọn ileewe kaakiri nilẹ Yoruba ati nilẹ Hausa, oun si ni Miṣọna Ansar-un-deen.

 

Ọkọ̀ bọ́ọ̀sì akẹ́kọ̀ọ́ gbiná, Àwọn ọmọdé tó lé ní ogún jóná ráúráú

Fẹ́mi Akínṣọlá
Ọkọ̀ bọ́ọ̀sì kan tó gbé àwọn akẹ́kọ̀ọ́ ilé ẹ̀kọ̀ alákọ̀bẹ́ẹ̀rẹ̀ kan ti gbiná lásìkò ìjàmbá ọkọ̀ kan tó wáyé ní ìlú Bangkoko tó jẹ́ olú ìlú orílẹ̀èdè Thai.

Awọn ọmọde mẹrindinlogun ati olukọni mẹta ni ori ko yọ ninu ijamba naa; amọṣa awọn akẹkọọ mejilelogun ati olukọni mẹta ni wọn ko ri mọ bayii, gẹgẹ bi minisita fun igbokegbodo ọkọ lorilẹede naa ṣe sọ.

Olootu ijọba orilẹede Thailand ṣalaye pe ijamba ọkọ naa lo ṣokunfa “iku ati ifarapa” – amọṣa wọn ko tii le sọ ni pato iye awọn eeyan to ku ninu ijamba ọkọ naa.

Awọn aworan to jade sita fihan bi ina ṣe jo ọkọ bọọsi naa patapata. Gẹgẹ bi ohun ti awọn ileeṣẹ iroyin abẹle lorilẹede naa sọ, awọn oluwadii ko ri aye wọ inu ọkọ naa nitori gbigbona ọkọ naa.

Mọkandinlogun ninu awọn ti ori ko yọ ninu ijamba ọkọ naa ti wa ni ile iwosan.

Ọkọ bọọsi to jona naa jẹ ọkan lara ọkọ bọọsi mẹta ti o n ko awọn ọmọde atawọn olukọ wọn nigba ti wọn n bọ nibi eto ijade abẹwo kan ti ile ẹkọ wọn ṣeto fun wọn lọ si ẹkun ariwa agbegbe Uthai Thani.

Minisita fun igbokegbodo ọkọ lorilẹede naa, Suriyahe Juangroongruangkit sọ pe afẹfẹ gaasi kan to lewu pupọpupọ ni wọn ṣe ohun amuṣagbara fun ọkọ bọọsi naa.

“Iṣẹlẹ to bani ninujẹ gidi ni iṣẹlẹ yii, bẹẹni ijọba yoo wa gbogbo ọna lati rii pe iru awọn ọkọ akero bayii ko lanfani lati lo irufẹ ohun amuṣagbara bayii nitori ọpọ ewu lo rọ mọ ọ.

Olootu ijọba orilẹede naa Paetongtarn Shinawatra sọ peijọba ni yoo san owo itọju gbogbo awọn eeyan to farapa ninu ijamba naa ti yoo si ṣe ẹtọ gba maa binu fun awọn to pa ipo da.

Piyalak Thinkaew, to n dari eto wiwa awọn eeyan to wa ninu ijamba naa ṣalaye pe awọn to ku ninu ijamba ọkọ to gbina naa jona to bẹẹ gẹ ti ẹnikẹni ko lee da wọn mọ rara.

Opopona marosẹ kan to wọ ilu Bangkok ni ọkọ bọọsi naa n gba nigba ti taya rẹ ṣa dede fọ, to si mu ko lọ kọlu irin idaabobo to yii opopona naa ki ina to sọ ni iwaju rẹ.

Iroyin sọ pe awakọ to wa ọkọ naa ti sa lọ, bi o tilẹ jẹ wi pe awọn alaṣẹ ti sọ pe wọn yoo waa jade nibikibi to ba pamọ si.

Ọjọ ori awọn akẹkọọ to wa ninu ọkọ ti ijamba ko yii ko tii kan si araye, amọṣa laarin ọdun mẹta si marundinlogun ni ọjọ ori awọn akẹkọọ ile ẹkọ naa.

Orilẹede Thailand wa lara awọn orilẹede ti iṣẹlẹ ijamba ọkọ ti kere julọ lagbaye.

Ẹlẹ́wọ̀n sálọ kúrò lọ́gbà ẹ̀wọ̀n ìlú Maiduguri
Nigerian Correctional

Fẹ́mi Akínṣọlá
Àwọn àgbà bọ̀, wọ́n ní èèyàn tó bá n wá nnkan kìí dákẹ́ ìbòòsì. Èyí ló bí igbe tí Iléeṣẹ́ tó n rí sí ọgbà ẹ̀wọ̀n ni Nàìjíríà, NCS, pa síta pé ẹlẹ́wọ̀n 281 làwọn ṣì n wá báyìí lẹ́yìn tí wọ́n sálọ kúrò lọ́gbà ẹ̀wọ̀n ìlú u Maiduguri.

NSC ni iṣẹlẹ naa lo waye latari bi awọn ṣe ko awọn ẹlẹwọn kuro lọgba ẹwọn naa nitori iṣẹlẹ omiyale to mi ilu Maiduguri titi.

Ninu atẹjade kan ti agbẹnusọ ileeṣe naa, Umar Abubakar fi lede lọjọ Aiku lo ti kede bẹẹ.

Abubakar sọ pe “ileeṣẹ Nigerian Correctional Service mọ nipa iṣẹlẹ omiyale to kọlu ilu Maiduguri, nipinlẹ Borno, atawọn ilu mii lagbegbe rẹ.

“O ṣeni laanu pe iṣẹlẹ yii ti da wahala silẹ ni bo ṣe wo ogiri ọgba ẹwọn naa, to fi mọ ile awọn oṣiṣẹ ọgba ẹwọn ọhun to wa niluu naa.

“Lẹyin ti a ko awọn ẹlẹwọn kuro ninu ọgba ẹwọn ọhun pẹlu iranlọwọ ileeṣẹ agbofinro mii, a ṣawari pe a ko ri ẹlẹwọn 281.”

Abubakar fi kun pe ileeṣẹ ọhun ni gbogbo iroyin nipa awọn ẹlẹwọn naa lọwọ, eyii to fi lede ninu atẹjade naa.

O ni “a n ṣiṣẹ pẹlu ifọwọsowọpọ awọn ẹka gbofinro mii lati ṣawari wọn.

“Lọwọ yii, ẹlẹwọn mẹtadinlogun ni a ti mu, ti a si ti da pada sinu ọgba ẹwọn, iṣẹ ṣi n lọ lọwọ lati ṣawari awọn to ku ki a le da wọn pada.”

Lẹyin naa lo fi da awọn araalu loju pe iṣẹlẹ naa ko ni ṣe akoba kankan fun abo araalu.

NNPCL kéde iye tí lítà epo bẹtiró yóò jẹ́ báyìí ní ìpínlẹ̀ kọ̀ọ̀kan

Fẹ́mi Akínṣọlá

Kò sí bojúbojú níbẹ̀ mọ́,
Àjọ tó ń rí sí ọ̀rọ̀ epo bẹntiróòlù ní Náìjíríà, NNPCL ti kéde yanya báyìí iye tí wọ́n yóò máa ta epo bẹntiró tí wọ́n rà lọ́wọ́ iléeṣẹ́ Dangote.

NNPCL nínú àtẹ̀jáde kan tí agbẹnusọ wọn, Olufemi Soneye fi léde lórí ẹ̀rọ ayélujára X lọ́jọ́ Ajé, ọjọ́ Kẹrìndínlógún, oṣù Kẹsàn-án ní iye tí àwọn máa ta epo náà wà ní ìbámu pẹ̀lú iye tí epo jẹ́ nínú oṣù náà.

Àtẹ̀jáde náà ṣàlàyé pé N950 NNPCL yóò máa lítà epo kan ní ìpínlẹ̀ Eko, tí wọ́n yóò sì máa tà á ní N1,019 ní àwọn ìpínlẹ̀ tó jínà bíi Borno, Yobe, Adamawa àti bẹ́ẹ̀ bẹ́ẹ̀ lọ.

Ní ìpínlẹ̀ Oyo, Osun, Kwara àti àwọn ìpínlẹ̀ tó yíiká, NNPCL kéde pé N960 ni àwọn yóò máa ta lítà kan níbẹ̀.

N980.22 ni wọ́n ní títa lítà epo bẹntiró Dangote yóò jẹ́ ní ìpínlẹ̀ Rivers, Bayelsa, Akwa Ibom àtàwọn ìpínlẹ̀ ní ẹkùn ààrin gbùngùn gúúsù Nàìjíríà.

Àtẹ̀jáde náà fi kun pé N999.22 ni wọn yóò máa ta lítà epo kan ní Abuja, Kaduna, Kano, Plateau, Nasarawa, Niger.

Soneye nínú àtẹ̀jáde náà ṣàlàyé pé ìjọba kọ́ ló ń sọ iye tí owọ bẹntiró yóò jẹ́ bíkòṣe ìdúnàádúrà láàrin àwọn tó ń ta epo àti iye tí wọ́n bá rà á.

Ó fi kún-un pé epo bẹntiróòlù tí àwọn gbé láti iléeṣẹ́ Dangote lọ́jọ́ Àìkú jẹ́ èyí tí àwọn fi owó dọ́là rà.

Ó ní ọjọ́ Kìíní, oṣù Kéwàá ni àwọn máa bẹ̀rẹ̀ òwò títa àti ríra epo pẹ̀lú Náírà.

Ó ṣàlàyé pé tí iléeṣẹ́ Dangote bá jiyàn àgbéjáde iye tí àwọn ra epo lọ́wọ́ wọn àti láti máa ta epo náà, inú àwọn yóò dùn bí wọ́n bá le yọ kúrò nínú owó náà fún àwọn.

NNPCL àti Dangote kò gbọ́ra wọn yé lórí iye epo bẹntiró
Ṣáájú ni NNPCL kéde pé N898 ni Dangote ta lítà epo bẹntiróòlù fún àwọn àmọ́ tí Dangote gbé àtẹ̀jáde kan jáde pé irọ́ tó jìnà sí òótọ́ ni ọ̀rọ̀ náà.

Dangote ní àwọn kò ta epo fún NNPCL ní N898 nínú àtẹ̀jáde kan tí wọ́n fi sórí ẹ̀rọ ayélujára X wọn àmọ́ wọn kò sọ iye tí wọ́n ta epo náà ní pàtó.

Èyí ló mú kí àwọn ọmọ Nàìjíríà náà máa bèèrè lọ́wọ́ Dangote pé èló gan-an ló tà á fún NNPCL àti pé kí wọ́n fi iye náà léde fọ́mọ Nàìjíríà.

Lẹ́yìn rẹ̀ ni NNPCL gbé iye tí wọ́n yóò máa ta epo náà fún ará ìlú jáde ní òwúrọ̀ ọjọ́ Ajé.

Fẹ́mi Akínṣọlá

Ò̩wó̩n epo! Àwọn ọ̀dọ́ ìlú Ipokia fárígá fún ilé-iṣẹ́ aṣọ́bodè, gbèdèke ọjọ́ mẹ́rìnlá péré

Ẹgbẹ́ kan, Ipokia Local Government Youth Forum (IPYF), ti fi ẹsun kan ilé-iṣẹ́ aṣọ́bodè ilẹ̀ Nàìjíríà, Nigeria Customs Service (NSC), pé wọ́n ń gbé epo tó yẹ fún àwọn èèyàn Ipokia lọ tà ní orílẹ-èdè Benin.

Ẹgbẹ IPYF ṣọ pe eyi ko jẹ ki awọn eeyan ri epo ra ni awọn ile epo ni gbogbo ijọba ibilẹ Ipokia.

Wọn ni idaamu gidi ati owo gọbọi ni wọn fi n ra epo bẹntiroolu lọwọ awọn to n ta a lọja okunkun (Black market).

Koda, gbedeke ọsẹ meji pere ni ẹgbẹ naa sọ pe awọn fun ileeṣẹ aṣọbode Naijiria lati dẹkun bi wọn ṣe ni wọn n gbe epo to yẹ fun Ipokia lọọ ta ni ibomiran.

Wọn ni bi inira airi epo ra ti awọn n koju ba fi tẹsiwaju lẹyin ọsẹ meji, nitori bi awọn oṣiṣẹ aṣọbode ṣe n gbabọde, awọn yoo ti gbogbo ilu pa ni.

Ṣaaju ni ẹgbẹ yii ti kọkọ fi lẹta kan ṣọwọ si ọga agba ileeṣẹ aṣọbọde Naijiria, Bashir Adewale, eyi ti Alaga wọn, Imoleayo Mawutin Deji, buwọlu lorukọ ẹgbẹ.

Ninu lẹta naa ni wọn ti ṣalaye pe ọdun 2019 ni ijọba ti ṣofin awọn oniṣowo epo ko gbọdọ ta epo ni ijọba ibilẹ Ipokia.

Eyi mu ki awọn araalu o maa rin irin ogun kilomita si ilu naa, ki wọn to o ri epo ra.

Ija ti araalu ja lo mu ki ijọba pada fi aaye gba ileepo mẹrin lati maa ta epo fun wọn laarin ilu.

Ṣugbọn wọn ko ta a fun araalu, afi fun awọn ti wọn n ta a si Benin.

Gẹ́gẹ́ bí Alága ẹgbẹ́ ọdọ ìjọba ìbílẹ̀ Ipokia ṣe wí, ó ní láàrin ọsẹ méjì yíì, kawọn Aṣọbode ṣe atunyẹwo epo 20km ti wọn n ṣe fún Ipokia.

Ki wọn mojuto awọn ileepo, lati ri i pe wọn n ta a fawọn eeyan.

O ni bi wọn ko ba le ṣe eyi, ki wọn kuku ti gbogbo ile epo to wa nijọba ibilẹ Ipokia pa.

‘’Ooṣa bo o ba le gbe mi, ṣe mi bi o ṣe ba mi.

‘’Lẹyin ọsẹ meji ti a fun wọn yii, bi wọn ko ba ti da wa lohun, gbogbo ijọba ibilẹ Ipokia ati Ogun West ni awa ọdọ maa tipa.

‘’Ati oṣiṣẹ aṣọbode o, ati ọlọpaa o, a o ni i jẹ ki ohunkohun ṣiṣẹ, a maa ti i pa a ni, afi ti wọn ba da awọn eeyan wa lohun. A o si ni i yi ipinnu wa yii pada o, iya yii ti pọju.’’

Ìgbìyànjú wa láti bá àjọ Aṣọbode ilẹ̀ wa sọrọ ló já sí pàbó.

Ajaero wá á wí tẹnu rẹ,Iléeṣẹ́ ọlọ́pàá pe ààrẹ ẹgbẹ́ òṣìṣẹ́ NLC fún onírúurú ìwà ọ̀daràn

Fẹ́mi Akínṣọlá

Iléeṣẹ́ ọlọ́pàá orílẹ̀ yìí ti kọ̀wé ránṣẹ́ pe Ààrẹ ẹgbẹ́ òṣìṣẹ́, NLC, Joe Ajaero lori ẹ̀sùn ṣíṣe agbátẹrù àwọn agbébọn, aṣekúpani.

Yatọ si ṣiṣe agbatẹru awọn agbebọn, ọlọpaa tun sọ pe Ajaero lọwọ ninu iwa jibiti ori ayelura ati oniruuru iwa ọdaran miran.

Iwe ipe ti wọn kọ ranṣẹ si Ajaero lọjọ kọkandinlogun, oṣu Kẹjọ, ọdun 2024, eyi ti igbakeji ọga ọlọpaa lẹka PIR, ACP Adamu Muazu buwọ ni wọn ti sọ pe ki alaga NLC naa wa sọ tẹnu rẹ.

Ileeṣẹ ọlọpaa sọ pe bi Ajaero ba kọ lati yọju si wọn gẹgẹ bi wọn ṣe fiwe pe e gẹgẹ bi ọmọluabi, awọn yoo fi kele ofin gbe e.

Ileeṣẹ ọlọpaa sọ ninu iwe ipe ti wọn fi ṣọwọ si Ajaero pe “ileeṣẹ ọlọpaa n ṣe iwadii lori ẹsun gbigbimọ iwa ọdaran, ṣiṣagbatẹru agbebọn, iwa ọdaran nla, igbimọ ọtẹ, lilo ipo lọna aitọ, ati jibiti ori ayelujara, eyi ti wọn ti darukọ rẹ.”

Ọlọpaa sọ pe Ajaero ni lati yọju si ọfiisi awọn logunjọ, oṣu Kẹjọ, ọdun 2024 ni deedee agogo mẹwaa owurọ, ni Abuja.

Ileeṣẹ ọlọpaa tun fidi rẹ mulẹ pe Ajaero ni lati mọ daju pe bi o ba kọ lati bọwọn fun iwe-ipe naa, kele ofin lawọn yoo fi gbe e janto.

Ẹgbẹ oṣiṣẹ NLC funra rẹ ti wa jẹ ko di mimọ pe lotitọ lawọn gba iwe-ipe naa lati pe alaga apapọ wọn, ati pe bi wọn ṣe pe Ajaero ko ṣẹyin bawọn ọlọpaa ṣe wa kọlu ileeṣẹ awọn.

Ninu atẹjade ti alakoso eto iroyin fun ẹgbẹ NLC, Benson Upah gbe jade, o sọ pe ejo lọwọ ninu.

“O foju han pe, a ko tii gbọ ohun to gbẹyin nipa bi wọn ṣe wa kọlu olu-ileeṣẹ NLC,” Upah lo sọ bẹẹ.

Ẹgbẹ oṣiṣẹ bu ẹnu atẹ lu ileeṣẹ ọlọpaa lori awọn to farapa lasiko iwọde ‘ebi n pa wa’ to lọ.

Ẹwẹ, igbimọ alaṣẹ ẹgbẹ oṣiṣẹ, NEC ti pe ipade pajawiri lori bi ileeṣẹ ọlọpaa ṣe ni ki Ajaero wa sọ tẹnu rẹ lori awọn ẹsun ti wọn fi kan an.

Laarọ ọjọ Iṣẹgun ni igbimọ NEC fi ipade pajawiri ọhun si eyi ti wọn ti kepe gbogbo awọn ti ọrọ kan lati wa nibi ipade naa.

Dẹ́rẹ́bà tó pa òṣìṣẹ́ LASTMA l’Ékòó wà ní gbaga agbófinró

Fẹ́mi Akínṣọlá

Iwájú Onídàájọ́ Oyindamọla Ogala, ti ilé-ẹjọ́ gíga kan tó wà nílùú Ikeja, ní ìpínlẹ̀ Èkó, ni wọ́n wọ́ dẹ́rẹ́bà mọto akérò kan, Ọ̀gbẹ́ni Shokoya, lọ l’Ọ́jọ́bọ, ọjọ́ kẹrin, oṣù Keje, ọdún yìí. Ẹsùn táwọn agbófinró ìpínlẹ̀ Èkó fi kan olùjẹ́jọ́ náà ni pé lọ́jọ́kẹtàdínlọ́gbọ̀n, oṣù Kínní, ọdún 2012, ó fi mọ́tò akérò rẹ̀, Opel, tí nọ́mbà rẹ̀ jẹ́ AAA 74 GG, pa Olóògbé Akinmade Samson Ọlawale, tó jẹ́ òṣìṣẹ́ àjọ tó ń rí sí ìgbòkègbodò ọkọ́ lójú títí ní ìpínlẹ̀ Èkó ‘Lagos State Traffic Management Agency’ LASTMA, l’Ópòópónà Demurin, lágbègbè Mile 12, níjọba ìbílẹ̀ ìdàgbàsókè Agboyi-Ketu, ní ìpínlẹ̀ Èkó. Ìwà tó hù ọ̀hún ni wọ́n ló lòdì sófin, tó sì ní ìjìyà lábẹ́ òfin ìpínlẹ̀ Èkó.

Lásìkò ti igbẹjọ ọhún wáyé nípa ẹsùn ti wọn fi kan an nile-ẹjọ lọjọ Tọsidee, ẹlẹrii ti agbefọba ijọba ipinlẹ Eko pe sita, Abilekọ Aderonkẹ Malik, sọrọ ta ko olujẹjọ nile-ẹjọ naa pe o mọ-ọn-mọ fi mọto rẹ pa oloogbe naa ni, nitori pe lasiko ti eṣu n gbọwọ rẹ lo lọwọ, oloogbe naa n bẹ ẹ pe ko ma fi mọto naa tẹ oun pa, ṣugbọn ti ko gba.

Ọjọ kẹtalelogun, oṣu Kẹfa, ọdun 2021, ni wọn kọkọ foju olujẹjọ bale-ẹjọ naa, to si sọ pe oun ko jẹbi rara lori ẹsun ti wọn fi kan oun, eyi lo mu ki adajọ sun igbẹjọ siwaju di ọjọ kẹrin, oṣu Keje, ọdun yii.

Lasiko to n gbe idajọ rẹ kalẹ, adajọ gboṣuba nla fun awọn agbefọba ipinlẹ Eko fun iṣẹ takuntakun ti wọn ṣe nipa ẹjọ naa.

O ni pẹlu gbogbo ẹri to wa niwaju oun, ko si awijare kankan fun olujẹjọ nipa ẹsun ti wọn fi kan an.

Lẹyin gbogbo atotonu, adajọ ju dẹrẹba ọhun sẹwọn ọdun mejila pẹlu iṣẹ aṣekara lọgba ẹwọn Kirikiri, l’Ekoo.

Kò sáàyè fáwọn tó bá fẹ́ dá wàhálà Yoruba Nation sílẹ̀ l’Ọ́ṣun o – Adeleke

Fẹ́mi Akínṣọlá

Gómìnà Ademọla Adeleke ti ìpínlẹ̀ Ọ̀ṣun ti gbé àwọn ẹṣọ́ ààbò dìde láti tako àwọn ajijangbara fún idasilẹ òmìnira ilẹ̀ Yorùbá, èyí tí àwọn olóyìnbó ń pè ní ‘Yoruba Nation Agigators’.

Bí ẹ kò bá gbàgbé, láìpẹ́ yìí ni àwọn ajìjàgbara yawọ ilé iṣẹ́ ìjọba ìpínlẹ̀ Ọ̀yọ́ nínú aṣọ̀kan ologun, nibi ti ewọn ti lọ da wahala nla silẹ, ṣugbọn ti ọwọ ọlọpaa pada tẹ awọn ti ko dini ni ogun.

Ṣùgbọ́n láti lè dẹ́kun irú ìṣẹlẹ̀ yìí ní ìpínlẹ̀ Ọ̀ṣun, Gómìnà Adeleke ti pàṣẹ fún oludamọran pàtàkì lórí ọrọ̀ ètò aabọ, Samuel Ojo láti dìde sí ọrọ̀ náà
Adeleke ní òun kò lajú sílẹ̀ láti jẹ́ kí ohun tó ṣẹlẹ̀ ní ìpínlẹ̀ Ọ̀yọ́ tún ṣẹlẹ̀ níbi tóun ti jẹ́ Gómìnà, fún ìdí èyí, ó ní àwọn elétò ààbò dúró digbí ní ìgbaradì sí ilé iṣẹ ìjọba ìpínlẹ̀ náà.

Bákan náà ló tún ní kí àwọn elétò lọ dáàbò bo ilé iṣẹ igbohun sáfẹ́fẹ́ ti ìpínlẹ̀ náà, ìyẹn Osun State Broadcasting Corporation (OSBC), èyí tó ni ó ṣeé ṣe kí àwọn ajìjàgbara náà kọlù.

A gbọ́ pé láti ọjọ́ Àbámẹ́ta, ọsẹ tó kọjá yìí làwọn elétò ààbò ti lọ dúró sí àwọn ilé-iṣẹ́ ìjọba àti gbogbo ibi tí ìjọba ní dúkìá tó jọjú sí nílùú Òṣogbo fún ètò ààbò tó péye.

Adeleke ti wá gba àwọn èèyàn lámọran láti lo ìfẹ, ìṣọ̀kan àti láti jẹ́ kí àlàáfíà jọba lásìkò yìí.

O ni dipo ki awọn ajijangbara maa pe fun idasilẹ orileede Yoruba, ki wọn gbajumọ bi atunṣe yoo ṣe tubọ deba iwe ofin orileede yii, eyi ti yoo ro awọn ipinlẹ lagbara nipa ojuṣe wọn.

Bákan náà ló fi kún ọrọ̀ rẹ̀ pé wàhálà kò lè yanjú ìṣòro orílẹ-èdè yìí, bí kò ṣe ìjíròrò àti àpérò tó lọ ni ìbámu pẹ̀lú ìwé òfin, tó sì lóun nígbàgbọ́ pé àtúnṣe tó ń lọ lọwọ́ lórí ìwé òfin Nàìjíríà yóò tan iṣoro naa.