October 2023

EFCC pe Afọbajẹ Ọ̀yọ́ méje lórí ẹ̀sùn gbígba àbẹ̀tẹ́lẹ̀ fúnpò Alaafin tuntun

Fẹ́mi Akínṣọlá

Ọ̀kánjúà ń dàgbà ọgbọ́n inú ẹ̀ ń rewájú.
Àjọ tó ń gbógun ti ìwà àjẹbánu lórílẹ̀-èdè Nàìjíríà, EFCC sọ pé lóòótọ́ làwọn pe àwọn afọbajẹ Ìlú Ọ̀yọ́ kan láti wá dáhùn ìbéèrè nípa ẹsùn tí èèyàn kan fi kàn wọ́n.

Ẹsùn yí gẹ́gẹ́ bí EFCC ṣe sọ ní í ṣe pẹ̀lú gbígba àbẹ̀tẹ́lẹ̀ láti yan Aláàfin Ọ̀yọ́ tuntun nínú àwọn tó díje dupò náà.

Agbẹnusọ àjọ náà Dele Oyewale ló fìdí ọ̀rọ̀ yí múlẹ̀ nínú ìfọ̀rọ̀wánilẹ́nuwoò pẹ̀lú akọ̀ròyìn

Ó ní ọ́fìsì àwọn tó wà ní Ìbàdàn ló fi ìwé pe àwọn kan nínú àwọn afọbajẹ Ìlú Ọ̀yọ́ láti wá dáhùn ìbéèrè ẹ̀sùn àjẹbánu tí olùpẹ̀jọ́ kan fi kàn wọ́n.

”Àwọn méje la fi ìwé pè, méjì nínú wọn sì dáhùn ìpè wa tí wọ́n sì ti wí tẹnu wọn”

Dele Oyewale sọ pé àjọ ọ̀hún kò lè dárúkọ àwọn tó fi ẹsùn kan àwọn afọbajẹ yìí.

Bẹ́ẹ̀ ló sì ní àwọn kò tún lè dárúkọ àwọn tí àwọn fìwé pé nínú àwọn afọbajẹ náà.

”Kò sí nínú ìlànà wa láti dárúkọ wọn. A kò sì tún lè sọ olùdíje tí wọ́n fẹ̀sùn kàn wọ́n pé wọ́n gba owó lọ́wọ́ rẹ”

Ọjọ́ kẹtàlélógún, osù kẹrin, ọdún 2022 ni Ọba Atanda Olayiwola Adeyemi wàjà.

Ó lo ọdún méjìléláàdọ́ta lórí àléfà kó tó wàjà.

Láti ìgbà tó ti papòdà ni àwọn tó ń díje dupò náà ti ń kópa nínú ìfọ̀rọ̀wánilẹ́nuwò lọ́dọ̀ àwọn Ọ̀yọ́ Mèsì tó ń ṣètò ẹni tí yóó di Aláàfin tuntun.
Mọ́kàndínláàdọ́rù-ún làwọn tó ń du ipò yí.

Fọ́nrán ìhòòhò mi lórí ayélujára kò sẹ̀yìn ọkọ àfẹ́sọ́nà mi- Moyo Lawal

Fẹ́mi Akínṣọlá

Ṣé wọ́n ní ìṣẹ̀lẹ̀ kan ní-ín fi í kọ́gbọ́n ẹ̀dá láyé bí ó tilẹ̀ jẹ́ pé kò dá a tó kì ẹ̀dá fi ọ̀rọ̀ araarẹ̀ kọ́gbọ́n.
Ní báyìí, gbajúgbajà òṣèré tíátà, Moyo Lawal ti sọ̀rọ̀ síta lórí fọ́nrán kan tó wà lórí ayélujára èyí tó sàfihàn ìhòòhò rẹ̀ àti ìbálòpọ̀ rẹ̀ pẹ̀lú ọkùnrin kan.

Lawal ṣàlàyé pé ọkọ àfẹ́sọ́nà òhun tẹ́lẹ̀ ni ọkùnrin tó gbé fọ́nrán náà síta sórí ayélujára.

“Mo fẹ́ jẹ́ kó di mímọ̀ pé fọ́nrán kan tí mo ṣe pẹ̀lú ọkọ àfẹ́sọ́nà mi tẹlẹ kìí se nǹkan tó yẹ kó bọ sórí ayélujára àti pé ìgbésẹ̀ yìí tàbùkù sí mi “

Nínú ọ̀rọ̀ tó gbé sórí ayélujára, ó ṣàlàyé bí nǹkan ṣe lọ lẹ́yìn tí fọ́nrán náà bọ́ sí orí ayélujára.

“Nǹkan tí mo lè sọ fún yín tó dá mi lójú ni pé nǹkan kò yẹ kó rí bó se rí. Ẹẹméjì péré ni mó ní ìbáṣepọ̀ lọdun tó kọjá, ẹyọ kan níbẹ̀ ní fọ́nrán tó bọ sórí ayélujára

“Mo gbà kó ya fọ́nrán yìí nítorí mo mọ̀ pé kò gbé lórílẹ̀ èdè Nàìjíríà.

“Ó ṣiṣẹ́ kárakára láti jẹ́ kí ń fi ọkàn tán òhun fún ọpọlọpọ ọdún tó jẹ́ pé a ti jọ lérò láti ra ilé, ṣe ìgbéyàwó àti àwọn nǹkan míì.”

Lawal tún mẹnubọ ọrọ̀ kan tó wà lórí ayélujára pé òun gan gan ló gbé fọ́nrán náà jáde.

“Fún àwọn tó ní èmi ni mo mọ̀ mọ̀ gbé fọ́nrán náà jáde, n ko ní nnkan tí mo fẹ sọ fun yin.

“Wọ́n ní nnkan tí kò bá pa èèyàn máa mú èèyàn lágbára síi ni. Gbogbo àwọn tó ṣe èyi, mo fẹ́ sọ fún yín pé n kò tíì sọ ìrètí nù. Mo dúró digbí “